世界杯與父親節

今日係父親節
我老豆走左十幾年,呢個節,由細到大响我屋企都唔"流行"
我老豆係傳統既父親,講唔啱就講手,打到七彩!但係,一家圍埋既時候,佢又好風趣的.
我又係一個唔識同佢溝通既仔,當然,我都唔係孝順仔,根本,我都唔識點"孝順".
我慢慢大,就慢慢"學壞",自然同佢既距離就更遠了.

直到,我睇波.原來,我發現我地係可以有共同話題
我記得,十六七歲既時候...年初四,我同老豆去大球場睇賀歲波,之後,
仲單獨同佢食左餐飯.懂事之後,係未試過的.
我仲可以為左同佢睇場波,一條友走去何文田足總,用晒d利是錢買波飛,仲蕩失路.
於是,兩個人,有計傾了.

一般電影,通常兩個人D關係有改善...編劇就搞個反高潮...事旦搞死一個.
幾年之後,佢就過左身了.
我同佢,只係"渡過"左一兩次世界杯.

球迷們!有得睇好睇多場了,由其同你老豆一齊睇