Thursday, November 30, 2006

墨攻

都有幾個月無去過戲院,老友相約去睇墨攻,好耐之前己經睇過漫畫,漫畫十萬分掂...對張之亮都有信心..入場!

可能希望大,老實講...唔太得,其中一大問題係劉華..好唔統一,有時做革離,有時做做下,又變番華Dee...仲有兩野生鬼表情你睇下...漫畫版個個係"古縮"佬一名,無時無刻都堅持理想個隻,加上戰爭,係好沉厚既一個人,不過劉華既演出...似失戀多過似為戰爭憂心.(佢响房婉拒范冰冰講個節就似足失戀王啦)另外唔知係咪片長既關系,對戰鬥既描寫變得表面化,漫畫好多革離同巷淹中既鬥智無晒.係漫畫巷淹中死不退兵既原因之一-佢搞盡腦汁都收唔死革離個種唔忿氣又係無晒(其實對佢兩條友都無咩鬥智既描寫),好似挖地道個段,漫畫係好詳細交代革離點破巷淹中呢招既,電影版變左好似佢好彩撞啱敵軍入侵咁...最後變左得番一D攻城既場面.唔係拍得差,但老實講睇過LORT既攻城,呢種處理都好難會有新鮮感.亦令佢最後佢兩個(革離,巷淹中)講數既感染力無晒.而導演又想講好多佢自己既想法.都令到部戲有d兩頭唔地岸.佢又用左好多時間講梁皇點出爾反爾.反而梁適同吳奇隆個角色削晒(漫畫個梁皇一路都係左閃右避,小腳色一件而己).而漫畫講到d平民經過多次守城同革離建立互信都係輕輕帶過.所以最後既革離離開都變得可有可無...

最最慘係加左啊范冰冰呢個漫畫無既人物,係咪都要搞d感情戲...又改到革離番梁城係為左佢...呢度最大敗筆,原來之前講咁多道理,最後都係為左溝女.無啦啦又變番天若有情.加埋架電單車就fit晒.另外戲中提到墨家唔願意派人去助梁皇,但又無細明原因,而漫畫中既原因,革離所講根本連墨家都己經開始分裂,部份人對自己既哲學都開始懷疑,所以先得佢一個人黎,同時反映左佢對墨家學說既堅持...但係電影呢一改,加埋劉華既處理,令到呢種堅持睇完都唔係好覺...

可能導演都要顧及下商業原素,要揾條女佢溝下,咁先夾番大眾口味,但係咁一搞,就咩mood都無晒,最尾劉拖住個細路女離開,仲有小小"道地"廣告feel...好在佢無押樽野出黎...

咁有無好野呢...導演講梁皇個種反覆無常,出爾反爾既小人心態,同牛將軍對佢個種忠誠,但最後發覺自己笨七到無人有都拍得好既,又啊吳奇隆幾好睇啊下,可惜佢既戲份亦唔太重.

套戲唔係唔好睇既,但有睇漫畫既,會發現少左好多重要野,無睇既,當佢一般古裝戰爭片加情情塔塔都ok既,點都好過無極,張藝某個d假鬼佬野假大空野先.

3 comments:

Unknown said...

咁你拎套谷底之作出唻,自然會覺得墨攻好睇好多啦。

felix said...

未算谷底,仲有滿城盡帶黃金bra都未上

Unknown said...

黃金聖衣未上,現時個谷底自然係無極啦。
當然以張大導功力,「低處未算低」確非難事...