歐國杯今晚就黎料，對我等球迷黎講(我係連越南對唔知咩山卡啦都睇得一餐既)重要性遠超d咩同一個夢想奧運呢種u23賽事既...(如果今年阿根廷有美斯同阿古路就要睇下既)
歐國杯對我有特別意義，可以話係我"睇波"生涯入面第一個大賽。時為88年，當年亦係荷蘭第一個大賽冠軍。加上我係十分鐘意古列治的(係勒，就係傳啊李珊珊溝佢定佢溝李珊珊個個古列治勒....當然仲有神級既雲巴士頓同埋*口水佬列卡特)，所以到而家我都十二分咁鐘意荷蘭的(包括埋橙色同林布蘭同"煩糕"!!)。雖然再早兩年既86世杯都係有睇，但印像就相對模糊勒(馬生既上帝之手同埋巴西對法國，我仲記得個講波佬話場波質素高，界外球都特別小既...)
近年歐洲杯各國既水平我覺得係拉近左的，可能多左球隊參加歐聯啦，又或者歐聯盟成立之後歐洲球員唔當係外援，多左人出國揾食，提高左水平啦...雖然四年前爆隊希臘出黎棒杯既情况好難再黎多次，但意法呢d傳統強隊都唔一定食硬。
咁今年荷蘭有無機會呢，個人覺得...窄D，最大問題係後防中堅成日甩漏，雲達沙再神勇都打唔晒架。所以荷蘭响"死亡之組"要出到線都唔易。個人更睇好德國(我買左十蚊高路斯攞神射手架!)，黑馬我就估克羅地亞同土耳其(博佢今晚扑低葡萄牙好分啊..haha！)
ps. http://cn.uefa.com/index.html 中國強大啦 , UEFA都有中文版啦!!! (...有左好耐啦)
ps2. http://www.wbxgame.com/wbxgame/default.aspx 朋友搞的歐洲杯遊戲，支持下啦!
ps3 *口水佬都係啊敊改既，佢仲次次都話要打電話比碧根巴教佢換人...haha.
No comments:
Post a Comment