响酒店等番屋企

一個人坐响酒店lobby，等夜ｄ上機番香港．
其他人呢，去晒universal studio,我懶，唔願郁，又唔玩個ｄ機動遊戲．所以唔去.
咁唔去，做咩好呢．．本來，諗過去downtown既LACMA(美術館黎既)，不過上網揾左好耐，都唔識去.
最後都係放棄左.人地話，响LA呢ｄ地方，無車係生活唔到，我親身體會到勒.我住呢間酒店左近，真係
可以無公共交通工具的...我番到香港會好好考埋個車牌．

去完E3，睇到好多野，基本上，二日半係睇唔晒既．人家個個booth都好落本，做得好靚（任天堂真係有一手)
咁香港館呢(我地係以HKDEEA得奬人既身份寄居响呢度)的確相差好遠好遠（台灣都比我地大一倍以上)．
再睇番香港館自己ｄ展品．．．係有排都未追到人家的．無論响基本構思，遊戲設計到畫面效果都未唔係好合格，甚至，主辦香港館既有關部門．佢地既構思，安排都有好多問題．另外，又識左好多"行家"（呢ｄ係指知到自己做緊咩個ｄ)．．．同咩都唔識但又响個行頭入面也文也武既茂利（佢地講既野又帶比我好多"歡樂").
真係大開眼界...so...你想响香港遊戲行業打出名堂，靠”吹”就得架勒...我會好好練習一下"口技"

睇完xbox360,ps3同wii...我真係覺得microsoft係會輸，輸唔係話佢會好似DC咁摺埋，而係，佢好難可以扒過sony頭，Wii都扒唔過，但一定可以改善由n64到gc同其他機種既距離，策略做得好ｄ，要過360都唔係無可能,因為wii真係令人覺得好好玩...不過有一個問題，玩佢ｄ　game真係會好累(我試坃wario玩到好似做gym咁).

响酒店既bar,著住巴塞波衫，睇左皇蘇對愛斯賓奴,結果愛斯賓奴1:0護級成功，成間bar最初得我同個酒保兩條友，兩個都睇得好肉緊.後來有個鬼佬入左黎.佢好似唔係好明點解有人會睇足球，不斷問我有咩咁好睇. 咁以我有限公司都咁既英文當然解釋唔到比佢知．結果啊酒保轉左另一部電視去glof台，佢就無聲出了...番到黎我會學好ｄ英文，等我下次解比知足球有咩咁好睇.

而家先五點，起碼都要等到十二點先起飛．睇新聞香港打風，舊年一個都打唔成，今年會唔會一炮中呢.馬會會唔會開盤呢，下盤讓幾多呢，我打埋咁多呢ｄ野係無好無聊呢...我都係去買野飲好了.